Son profesora Catedrática de Universidade da Área de Estomatoloxía no Departamento de Cirurxía e Especialidades Médico-Cirúrxicas na Universidade de Santiago de Compostela (USC) desde 2022. Na actualidade, son Coordinadora da Unidade Clínica e de Investigación en Odontoloxía para Pacientes con Necesidades Especiais, Coordinadora do Grupo de Investigación “Oral Sciences Research Group” da USC, pertencente á Fundación Instituto de Investigación Sanitaria de Santiago de Compostela (FIDIS). Son Investigadora Colaboradora en institucións internacionais como o Eastman Dental Institute, Queen Mary University of London e King’s College London. A miña investigación está centrada no avance científico das Ciencias Odontolóxicas, comezando inicialmente no campo da microbioloxía oral para incorporar, nos últimos dez anos, as tecnoloxías ómicas e as técnicas de intelixencia artificial.
O grupo de investigación que lidero, Oral Sciences Research Group na USC e o FIDIS, está centrado actualmente no desenvolvemento da liña de investigación principal: entendemento e diagnóstico das enfermidades orais humanas e a súa relación coas enfermidades sistémicas mediante a aplicación e desenvolvemento de técnicas bioinformáticas en tecnoloxías ómicas e de intelixencia artificial.